Gjatë orëve të para të mëngjesit të së dielës, më 26 korrik 2026, autoritetet policore gjermane kanë ndaluar një automjet me targa gjermane në rrugën federale B2, pranë Mittenwaldit, nën dyshimin për kontrabandim të qenieve njerëzore. Drejtuesi i mjetit, një shtetas shqiptar 28-vjeçar me leje qëndrimi dhe patentë shoferi gjermane, po transportonte pesë shtetas kolumbianë.
Sipas njoftimit të policisë, gjatë kontrollit u zbulua se njëri prej pasagjerëve, një 15-vjeçar, ishte vendosur në bagazhin e makinës mes rrobave dhe sendeve personale, për shkak se në kabinën e pasagjerëve nuk kishte më vende të lira. I dyshuari deklaroi se ishte në dijeni të rrezikut të transportit në këto kushte, por pretendoi se i mituri kishte hyrë vullnetarisht në bagazh.
Policia bëri të ditur se asnjëri nga pesë shtetasit kolumbianë nuk posedonte dokumente identifikimi të vlefshme për hyrje në Gjermani. Megjithatë, nga verifikimet rezultoi se ata kishin qenë të regjistruar më parë në territorin gjerman. Pas procedurave policore, të rinjtë iu dorëzuan autoriteteve kompetente të emigracionit, të cilat do të vendosin mbi statusin dhe qëndrimin e tyre të mëtejshëm.
Shtetasi shqiptar, i cili është banues në landin e Saksonisë së Poshtme, u lirua pas marrjes në pyetje. Megjithatë, ndaj tij pritet të ngrihet procedim penal nën dyshimin për kontrabandim të të huajve.