Policia e Kosovës arrestoi më 3 nëntor në Prishtinë një shtetas kosovar të dyshuar për përfshirje në një rrjet të organizuar ndërkombëtar të kontrabandimit të migrantëve. Operacioni u krye nga Sektori i Hetimeve i Departamentit për Kufi, në bashkëpunim me Agjencinë e Kosovës për Inteligjencë (AKI) dhe me autorizimin e Prokurorisë Themelore në Prishtinë.
Sipas hetimeve, rrjeti dyshohet se shtrihej në disa shtete të Ballkanit dhe në vende të Bashkimit Evropian. Policia thotë se roli i të dyshuarit ishte rekrutimi i shoferëve, të cilët pajiseshin me automjete, mjete financiare dhe harta të sakta të lëvizjes.
Shoferët dyshohet se transportonin migrantë që kalonin në mënyrë të paligjshme nga Turqia në Greqi, fillimisht drejt Selanikut. Më pas, udhëtimi vazhdonte tranzit përmes shteteve të tjera drejt Evropës.
Gjatë operacionit u bastis banesa e të dyshuarit në Prishtinë. Policia gjeti dhe sekuestroi përkohësisht 1 760 euro para të gatshme dhe fletë-transaksione të ndryshme financiare, të cilat u morën si prova materiale.
I dyshuari u intervistua në prani të avokatit mbrojtës. Me urdhër të prokurorit, ndaj tij u caktua masa e ndalimit policor për 48 orë, për procedura të mëtejshme ligjore. Rasti po trajtohet nga organet kompetente.