Shtetasi shqiptar Alfred Maçi, 36 vjeç, ka pranuar ekstradimin nga Anglia pas vendimit të gjykatës City of Westminster Magistrate Court. Ai kërkohej nga Prokuroria e Tiranës nën akuzën e trafikimit të emigrantëve drejt SHBA-së dhe Kanadasë.
Hetimet e udhëhequra nga prokurori Drini Pali, në bashkëpunim me Shërbimin Diplomatik të Sigurisë dhe Zyrën për Hetimet Kriminale të SHBA-së, zbuluan se grupi kriminal, i drejtuar nga Hazir Maçi, përdorte pasaportën britanike të Alfred Maçit për të pajisur emigrantët me dokumente të falsifikuara. Pasaporta, e lëshuar më 16 mars 2022, mbante si vendlindje Kosovën dhe ishte objekt i klonimit, ku fotografi të personave të tjerë vendoseshin për të mundësuar kalimin kufitar.
Sipas dosjes hetimore, aktiviteti kriminal zhvillohej në disa faza:
• Rekrutimi i personave në Shqipëri.
• Transporti drejt vendeve të Evropës dhe më pas drejt Republikës Domenikane.
• Kalimi drejt Kanadasë ose Porto Rikos, me destinacion final Floridën në SHBA.
Grupi akuzohet për ndihmën ndaj shtetasve të identifikuar si E.A. në tetor 2024 dhe D.N. në maj 2025. Për këto shërbime, përfituesit paguanin shuma që shkonin deri në 35.000 euro. Hazir Maçi, nipi i të cilit është Alfred Maçi, konsiderohet si organizator i këtij rrjeti që përfshinte dërgimin e paligjshëm të shtetasve shqiptarë drejt Amerikës së Veriut.