Shtatë nga 21 protestuesit e arrestuar gjatë protestës kombëtare të organizuar nga opozita më 10 shkurt në Tiranë do të dalin nesër, më 13 shkurt, para Dhomës Penale të Gjykatës së Tiranës për vendimmarrje mbi masat e sigurisë.
Seanca gjyqësore parashikohet të nisë në orën 12:00, sipas shkresës së gjykatës drejtuar Drejtorisë Vendore të Policisë së Tiranës, që kërkon shoqërimin e të arrestuarve.
Të arrestuarit janë:
• Rei Bogdani
• Sindrit Peka
• Joel Korbi
• Kreshnik Kastrati
• Zeni Guraj
• Daniel Zeka
• Oresti Halilaj
Ata akuzohen për veprat penale:
• Goditja për shkak të detyrës
• Plagosja e rëndë me dashje
• Prishja e rendit dhe qetësisë publike
• Shkelja e rregullave mbi lëndët plasëse dhe djegëse
• Shkatërrimi i pronës me zjarr
• Kundërshtimi i punonjësit të rendit publik
Protestuesit hodhën molotovë drejt Kryeministrisë dhe Parlamentit, sipas policisë.
Nën hetim në gjendje të lirë është vënë sekretari organizativ i Partisë Demokratike, Ervin Minarolli, për organizimin dhe pjesëmarrjen në grumbullime të paligjshme si dhe shtytjen e të miturit në krim.
Materialet u referuan edhe për deputetët Belind Këlliçi, Flamur Noka, Klevis Balliu dhe Luan Baçi, për kundërshtimin e punonjësve të policisë dhe shtytjen e të miturit në krim.
Sipas policisë, nga molotovët u lënduan 16 efektivë, të cilët pësuan djegie dhe dëmtime fizike dhe u mjekuan në spital. Gjithashtu, deputeti Bledjon Nallbati përfundoi në spital me hematomë në kokë dhe shqetësime nga gazi lotsjellës i hedhur nga policia.