Një ngjarje tragjike është shënuar në Padova të Italisë, ku Altin Kokiçi, 51 vjeç, ka humbur jetën në një kantier ndërtimi ku po kryheshin punime rikonstruksioni. Viktima ishte pronar i një kompanie të specializuar në punimet e muraturës me seli në Sossano, në provincën e Vicencës.
Sipas informacioneve të autoriteteve, dyshohet se Kokiçi ka rënë aksidentalisht në hapësirën e ashensorit të ndërtesës. Kërkimet për 51-vjeçarin nisën pasi familjarët e tij ngritën alarmin, për shkak se ai nuk kishte pasur asnjë kontakt që prej orëve të pasdites. Furgoni i tij u gjet i parkuar pranë ndërtesës, me pjesën e ngarkesës të hapur, ndërsa përmes gjeolokalizimit të celularit u përcaktua se ai ndodhej brenda perimetrit të kantierit.
Patrullat e policisë, pas mbërritjes në vendngjarje, arritën të gjenin vendndodhjen e trupit duke telefonuar celularin e viktimës dhe duke ndjekur sinjalin e tij deri te boshti i ashensorit. Përveç forcave të policisë, në operacion ndërhynë ekipet e emergjencës mjekësore dhe zjarrfikësit. Autoritetet italiane kanë nisur hetimet për të sqaruar dinamikën dhe rrethanat e sakta të këtij aksidenti në punë.
Sipas raportimeve, kantieri ku ndodhi ngjarja ndodhej në Via Goito dhe bëhej fjalë për një ndërtesë historike.
Përditësime
Autoritetet italiane saktësuan se trupi i Altin Kokiçit u gjet gjatë natës mes të mërkurës dhe të enjtes, pas sinjalizimit të familjarëve për mungesën e kontaktit. Viktima drejtonte një kompani të specializuar në ndërtimin e mureve.