Stockholm International Peace Research Institute (SIPRI) ka publikuar të dhëna që tregojnë se Serbia, në pesë vitet e fundit, ka importuar sisteme të avancuara armatimi nga 13 vende. Furnizuesit kryesorë kanë qenë Kina dhe Rusia.
Sipas raportit, Kina ka qenë partneri më i madh në furnizimin me sisteme të mbrojtjes ajrore me rreze të mesme, ndërsa donacionet më të mëdha për Serbinë kanë ardhur nga Rusia dhe Bjellorusia. Ekspertët theksojnë se Beogradi ka shfrytëzuar ndryshimet në sigurinë globale dhe konfliktet ndërkombëtare për të rritur investimet në armatim.
Serbia ka përdorur edhe zhvillimet rajonale për të përforcuar narrativën se është e rrezikuar. Një shembull është reagimi ndaj bashkëpunimit të sigurisë mes Kosovës, Shqipërisë dhe Kroacisë, të cilin zyrtarët serbë e kanë paraqitur si kërcënim për Serbinë.
Sipas ekspertëve, ky bashkëpunim nuk përbën një aleancë ushtarake, por kufizohet kryesisht në ushtrime të përbashkëta, trajnime dhe koordinim aktivitetesh, që në shumicën e rasteve zhvillohen në kuadër të NATO-s.
Raporti thekson: «Një rritje e ndjeshme e përqindjeve shpesh duket dramatike, por kur kombinohet me retorikë të ashpër politike dhe raportime sensacionaliste, krijon një ndjenjë pasigurie midis fqinjëve dhe shërben si justifikim për investime të reja ushtarake».