Situata e zjarrit në zonën e Pukës vijon të mbetet kritike. Flakët, të cilat nisën 5 ditë më parë në Fushë-Laj të Tërbunit, janë përhapur në drejtim të fshatrave Gojan i Vogël, Gojan i Madh, Gjegjan dhe Haxhiaj. Sipas të dhënave, zjarri ka shkaktuar dëme në mbi 120 hektarë pyje, ku përfshihen edhe masive me pishë të zezë.
Në Gojan të Vogël, ku rrezikohen rreth 30 banesa, forcat e policisë janë dislokuar për të mundësuar evakuimin e banorëve në rast nevoje. Gjatë operacioneve janë raportuar dëme në stane bagëtish, ndërsa disa prej tyre janë djegur plotësisht. Terreni i thyer dhe erërat e forta kanë vështirësuar ndërhyrjen e mjeteve zjarrfikëse dhe trupave tokësore.
Ndërkohë, autoritetet vijojnë përpjekjet për izolimin e vatrave. Përhapja e flakëve në një sipërfaqe të madhe ka shtuar shqetësimin për banorët e zonës, të cilët kanë kërkuar ndërhyrje nga ajri për të frenuar përparimin e zjarrit drejt banesave.