Situata e zjarreve në fshatrat Riban dhe Ngraçan të Bashkisë Mallakastër vijon të jetë problematike. Flakët janë përhapur me shpejtësi në masivet pyjore, duke shkaktuar djegien e pishave dhe zgjerimin e vatrave të zjarrit.
Kryetari i Bashkisë së Mallakastrës, Qerim Ismailaj, deklaroi se ndërhyrja ka qenë e kufizuar për shkak të terrenit të vështirë kodrinor, erës së fortë, temperaturave të larta dhe bimësisë që favorizon përhapjen e flakëve. Gjatë ditës, në terren kanë operuar 110 forca për përballimin e situatës. Sipas Ismailaj, forcat do të vijojnë monitorimin gjatë natës, ndërsa ndërhyrja nga ajri është parashikuar të rinisë të enjten në orën 05:30.
Deputeti i Partisë Socialiste në Mallakastër, Klevis Jahaj, theksoi se përpjekjet kanë qenë të përbashkëta, duke përfshirë ushtrinë dhe zjarrfikësit nga Berati e Cërriku. Jahaj u bëri thirrje banorëve të zonës të tregojnë vigjilencë të lartë dhe të ndjekin udhëzimet e autoriteteve për çdo rast evakuimi që mund të jetë i nevojshëm. Përballë kësaj situate, autoritetet vendore kanë deklaruar se do të qëndrojnë në terren gjatë gjithë natës për të ndjekur zhvillimet në zonat e prekura.