Për të gjashtën ditë radhazi, zjarret masive vazhdojnë të përfshijnë sipërfaqe të mëdha me pyje, ullishte dhe vreshta në territorin e Mallakastrës. Flakët janë përhapur edhe në drejtim të bashkive Patos dhe Roskovec, duke kërkuar angazhimin e forcave zjarrfikëse nga të treja këto zona. Ndonëse në zonën e Koilaçit zjarri është izoluar, vatrat në Drenije, Panahor, Vlosh dhe Lofkënd mbeten aktive dhe kërkojnë monitorim të vazhdueshëm.
Ndërhyrja në terren po kryhet nga forcat zjarrfikëse dhe strukturat bashkiake, të cilat po përballen me vështirësi për shkak të terrenit malor dhe erës së fortë. Pasditen e 9 gushtit, operacioni është intensifikuar përmes ndërhyrjeve nga ajri me helikopter dhe avion, veçanërisht në zonat ku aksesi me mjete tokësore është i pamundur. Autoritetet theksojnë se, ndonëse intensiteti i flakëve në disa orë të ditës është shfaqur më i ulët, ndryshimet e shpejta të erës mbeten faktori kryesor që rrezikon riaktivizimin e vatrave dhe përhapjen e tyre drejt zonave të banuara. Puna në terren vazhdon pa ndërprerje për të mbrojtur banesat dhe për të neutralizuar plotësisht vatrat e zjarrit.
Përditësime
Situata e zjarreve në Mallakastër është përkeqësuar pas riaktivizimit të vatrës në Panahor, e cila ka shtrirë flakët drejt zonës së Greshicës. Autoritetet kanë urdhëruar evakuimin e banorëve në Koilaç për shkak të rrezikut të drejtpërdrejtë ndaj banesave. Për të përballuar përshkallëzimin, Agjencia e Mbrojtjes Civile ka angazhuar forca shtesë zjarrfikëse nga Fieri, Berati dhe Lushnja. Dëmet në terren kanë shënuar rritje të konsiderueshme, me dhjetëra hektarë pyje, ullishte dhe vreshta të shkrumbuara nga flakët.
Situata në fshatrat Ngraçan, Rriban dhe Panahor është normalizuar plotësisht, pas ndërhyrjeve të vazhdueshme. Forcat e Ushtrisë janë dislokuar në terren për të mbështetur operacionet e shuarjes së zjarreve. Aktualisht, përpjekjet e ekipeve janë përqendruar në zonën e Drenies. Autoritetet konfirmojnë se flakët në këtë sektor nuk paraqesin rrezik për zonat e banuara.
Erërat e forta kanë komplikuar situatën në Mallakastër, duke sjellë riaktivizimin e vatrave të zjarrit në Vlosh. Ndërkohë, autoritetet njoftuan se zjarri në Drenie e ka origjinën nga zona e Rribanit, ku erërat e forta e kanë orientuar përhapjen e flakëve drejt këtij sektori.
Ministria e Mbrojtjes deklaroi se vatrat e zjarrit në Mallakastër, përfshirë akset Panahor-Ndrenie-Vlosh dhe Koilaç-Greshicë/Hekal, janë vënë tashmë nën kontroll. Operacioni në zonën e Mallakastrës u mbështet nga 20 efektivë të Forcave të Armatosura (FA), 10 zjarrfikës të MZSH, 20 punonjës bashkiakë dhe 4 pjesëtarë të shërbimit pyjor. Njëkohësisht, në sektorin e Drenies janë angazhuar 20 efektivë të FA, 12 zjarrfikës, 10 punonjës bashkiakë dhe 3 mjete operacionale. Përtej Mallakastrës, autoritetet po përballen me vatra të reja në dy zona të tjera të vendit: zjarrfikësit janë mobilizuar për shuarjen e flakëve në Krastë të Krujës dhe në zonën e Vilëzit në Kurbin.
Autoritetet raportuan përhapje të flakëve në zonat Rribani dhe Ngraçani në bashkinë Patos, ku forcat operacionale janë angazhuar për izolimin e vatrave. Në të njëjtën kohë, ekipet e zjarrfikësve konfirmuan shuarjen e plotë të vatrave në Xhaferaj-Oblikë, Spatharë dhe Kodrën e Butë në Cërrik, pas ndërhyrjeve të suksesshme në terren.
Forcat operacionale kanë arritur të shuajnë plotësisht vatrat aktive në zonën e pyllit me pisha në Drenie dhe Vlosh. Efektivat në terren po ushtrojnë monitorim të vazhdueshëm mbi trungjet që vijojnë të nxjerrin tym, me synim parandalimin e çdo riaktivizimi të mundshëm të flakëve.
Flakët në zonat e fshatit Halilaj dhe Krastës kanë avancuar në orët e fundit, duke iu afruar zonave të banuara. Situata paraqitet kritike në Halilaj, ku zjarri rrezikon drejtpërdrejt linjat e tensionit të lartë. Në zonën e Krastës, për shkak të terrenit të thyer që pamundëson ndërhyrjen tokësore, autoritetet kanë nisur operacionin e shuarjes nga ajri.
Ministri i Mbrojtjes, Niko Peleshi, inspektoi personalisht operacionin në zonën e fshatit Halilaj. Ai vlerësoi punën e forcave operacionale në terren dhe koordinimin e ndërhyrjeve për izolimin e flakëve që kërcënojnë zonat e banuara.