Gjatë pasdites së 28 gushtit 2026, një zjarr i fuqishëm përfshiu masivin pyjor midis fshatrave Xhyrë dhe Vehçan, në Njësinë Administrative Hotolisht. Zjarri, i cili kishte nisur që prej mesditës, u përhap me shpejtësi në disa drejtime për shkak të terrenit të thyer dhe bimësisë së thatë.
Situata u përkeqësua ndjeshëm pas orës 17:00, kur flakët iu afruan banesave në zonën e ish-stacionit hekurudhor të Xhyrës, si dhe në afërsi të aksit kombëtar Librazhd-Përrenjas. Për mbrojtjen e banesave dhe objekteve përreth, janë angazhuar dhjetëra forca dhe mjete të shërbimit zjarrfikës nga Librazhdi, Përrenjasi, Elbasani, Gramshi dhe Cërriku.
Ekipe të shumta në terren po punojnë për të frenuar avancimin e flakëve dhe për të neutralizuar vatrat aktive, në një operacion që vlerësohet si dinamik për shkak të përhapjes së shpejtë të zjarrit në sipërfaqe të konsiderueshme. Autoritetet vendore vijojnë të monitorojnë situatën për të shmangur rrezikun ndaj zonave të banuara dhe për të izoluar plotësisht vatrat e zjarrit.
Përditësime
Autoritetet nisën ndërhyrjen nga ajri me helikopter për të frenuar përhapjen e flakëve në Xhyrë. Përdorimi i helikopterit konsiderohet element kyç në operacionin për mbrojtjen e banesave pranë ish-stacionit të trenit, ku zjarri paraqet rrezikun më të lartë.
Forcat e Armatosura të Republikës së Shqipërisë iu bashkuan operacionit në terren për të frenuar flakët në Xhyrë. Autoritetet e policisë njoftuan nisjen e hetimeve zyrtare mbi dyshimet se zjarri është shkaktuar nga një zjarrvënie e qëllimshme. Paralelisht me strukturat shtetërore, dhjetëra banorë të zonës po ndihmojnë në përpjekjet e shuarjes me mjete rrethanore për të mbrojtur pronat e tyre.