Kryetari i Komunës së Vitisë, Sokol Haliti, ka reaguar pas ngjarjes tragjike të ndodhur në fshatin Livoç të Gjilanit, ku mbetën të vrarë dy anëtarë të familjes Bogujevci nga Pozherani, ndërsa një person tjetër mbeti i plagosur. Kreu i Vitisë, përmes një njoftimi zyrtar, u ka shprehur ngushëllimet më të sinqerta familjarëve dhe të afërmve të viktimave, ndërsa të plagosurit i ka uruar shërim sa më të shpejtë dhe të plotë.
Në mesazhin e tij, Haliti e ka dënuar ashpër këtë akt, duke vlerësuar se dhuna dhe marrja e jetëve të njerëzve janë të papranueshme dhe nuk mund të kenë asnjë arsyetim. Ai theksoi se siguria e qytetarëve dhe mbrojtja e jetës duhet të mbeten përparësi absolute për të gjitha institucionet dhe shoqërinë.
“Njëkohësisht, shpreh shqetësimin dhe indinjatën time të thellë për këtë rast të rëndë dhe bëj thirrje që organet kompetente të veprojnë me urgjencë, të zbardhin plotësisht rrethanat e ngjarjes dhe përgjegjësit të përballen me drejtësinë”, deklaroi Haliti.
Sipas informacioneve të raportuara nga Gazeta Blic, viktimat janë identifikuar si Nafije dhe Egzoni Bogujevci, ndërsa i plagosuri është djali i xhaxhait të Nafijes. I njëjti burim raporton se vrasja është kryer nga bashkëshorti i Nafije Bogujevcit.