Prokuroria e Posaçme kundër Korrupsionit dhe Krimit të Organizuar ka dërguar pranë Gjykatës së Posaçme të Shkallës së Parë kërkesën për gjykimin e procedimit penal nr. 136 të vitit 2024. Katër të pandehurit akuzohen për krijimin e një skeme financiare për futjen e fondeve me origjinë të dyshuar kriminale në ekonominë formale.
Sipas hetimeve, të pandehurit themeluan në qershor të vitit 2024 tri shoqëri tregtare: “Wingwort” sh.p.k., “Wortnova” sh.p.k. dhe “Wortend” sh.p.k. Këto subjekte, të regjistruara me kapital minimal dhe në të njëjtën adresë, nuk kanë zhvilluar veprimtari reale ekonomike. Dokumentacioni hetimor evidenton përdorimin e këtyre kompanive për transaksione të mëdha bankare, fatura fiktive dhe transferta ndërkombëtare pa dokumentacion mbështetës.
Një pjesë e fondeve është investuar në blerjen e dy pronave në zonën e Dhërmiut, me sipërfaqe prej 23.16 hektarësh, për vlerën e deklaruar prej 1,621,200 euro. Ekspertiza vlerësuese ka konstatuar se vlera reale e tregut ishte më e lartë se ajo e pasqyruar në kontratat e shitblerjes. Hetimet janë mbështetur edhe nga bashkëpunimi me autoritetet gjyqësore të Mbretërisë së Spanjës, të cilat kanë njoftuar se disa prej të pandehurve janë nën hetim për vepra penale të mashtrimit.
Domingo Romillo Iriarte është identifikuar si drejtuesi i skemës, ndërsa rolet e të pandehurve të tjerë janë specifikuar sipas akuzave për grup të strukturuar kriminal dhe bashkëpunim në pastrimin e produkteve të veprës penale.