Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dërguar për gjykim katër persona të akuzuar për pjesëmarrje në një grup të strukturuar kriminal, tentativë vrasjeje dhe armëmbajtje pa leje.
Dosja e procedimit penal nr. 220 e vitit 2024 është dërguar në Gjykatën e Posaçme të Shkallës së Parë për Korrupsionin dhe Krimin e Organizuar. Të pandehur në këtë procedim janë shtetasit Aleksandër Prendi, Franko Leka, Izmir Sakicaj dhe Samuel Troshani.
Aleksandër Prendi akuzohet për vrasje në rrethana të tjera cilësuese kundër dy ose më shumë personave, të mbetur në tentativë, dhe për mbajtje pa leje të armëve luftarake. Franko Leka, Izmir Sakicaj dhe Samuel Troshani akuzohen për sigurim kushtesh dhe mjetesh materiale për të kryer vrasje, mbajtje pa leje të armëve luftarake, pjesëmarrje në grup të strukturuar kriminal dhe kryerje veprash penale nga organizata kriminale.
Hetimet lidhen me një atentat të organizuar ndaj Aleksandër Prendit në zonën e Vaut të Dejës më 23 gusht 2024. Të dyshuarit kanë vepruar të armatosur dhe të organizuar në disa automjete të blinduara. Në vendngjarje ka pasur shkëmbim zjarri, por nuk janë raportuar persona të vrarë. Një pjesë e personave të përfshirë mbeten ende të paidentifikuar dhe hetimet vijojnë.
Sipas ligjit, të gjithë të pandehurit prezumohen të pafajshëm deri në një vendim të formës së prerë të gjykatës.