Operacioni i SPAK-ut ka sjellë nxjerrjen e urdhër-arrestit për Salvadore Aliun, një figurë qendrore në trafikun ndërkombëtar të kokainës nga Amerika Latine drejt Europës. Hetimet kanë provuar se grupi ka trafikuar të paktën 50 tonë kokainë, duke shërbyer si furnitor për rrjete të tjera kriminale.
Detajet e sekuestrimeve
Nga hetimet janë dokumentuar 5 episode të trafikut, ku janë sekuestruar gjithsej 8 tonë e 960 kilogramë kokainë:
• 11 maj 2020: 700 kg të sekuestruara në portin e Waasland, Belgjikë.
• 6 qershor 2020: 2,010 kg në Guayaquil, Ekuador.
• 16 gusht 2020: 1,100 kg në Roterdam, Holandë.
• 16 dhjetor 2020: 4.1 tonë në Roterdam, Holandë.
• 3 shkurt 2021: 1 ton e 50 kg të sekuestruara në Kolumbi.
Pastrimi i parave dhe komunikimet
Sipas dosjes hetimore, Salvadore Aliu përdorte aplikacionin e koduar SKY ECC për të koordinuar aktivitetin kriminal nën pseudonimet “Dala”, “Qero”, “Qerosi”, “Viktor” dhe “Albo Pelon”.
Ai dyshohet se ka pastruar rreth 30 milionë euro në Shqipëri, duke shfrytëzuar katër kompani të vëllait, Isa Aliu, për blerje pasurish të paluajtshme, vila dhe ndërtime hotelesh në zona turistike. Në një bisedë të gushtit 2020, Aliu udhëzoi vëllanë të fshihte shumat e parave në fuçi 50-litërshe dhe t'i groposte ato. Në kuadër të hetimeve, policia ka kryer 23 kontrolle në banesa dhe zyra të subjekteve tregtare.