Hetimet e SPAK-ut kanë zbuluar detaje mbi funksionimin e një organizate të gjerë të trafikut ndërkombëtar të kokainës, ku rolet kryesore ishin të ndara mes Eldi Dizdarit dhe Shpëtim Aliut. Nga komunikimet e zbardhura në aplikacionin e koduar Sky ECC, rezulton se Dizdari kërkonte dërgesa të vazhdueshme, duke u shprehur se mund të përballonte deri në 10 ngarkesa në javë dhe të priste deri në 10 tonë kokainë.
Sipas dosjes hetimore, Dizdari i kishte transferuar Shpëtim Aliut të paktën 8 milionë euro brenda një periudhe të shkurtër për organizimin e dërgesave nga Ekuadori. Shpëtim Aliu kishte rolin e siguruesit dhe koordinuesit të nisjes së ngarkesave, ndërsa Dizdari kujdesej për pritjen dhe nxjerrjen e tyre nga portet evropiane.
Në këtë skemë kriminale janë përfshirë edhe shtetas si Armando Pacani, Sokol Bibaj dhe Dritan Gjika. Sipas SPAK, Gjika siguronte lëndën narkotike, ndërsa Aliu garantonte daljen e ngarkesave përmes korruptimit të zyrtarëve në Ekuador. Në një prej mesazheve, Aliu shprehte shqetësimin për shpenzimet e larta, duke u shprehur se zyrtarët vendas i shihnin ata vetëm si "dollarë".
Pjesë e kësaj organizate, sipas hetimit, janë edhe nipërit e Aliut, Oklid Ej Ouejdi (i njohur edhe si Oklid Aliu ose Oklid Dalipi) dhe Naldi Yzeraj. Operacioni i SPAK-ut ka çuar në lëshimin e 10 urdhër-arresteve dhe sekuestrimin e pasurive me vlerë rreth 150 milionë euro, të cilat dyshohet se janë përfituar nga aktiviteti i paligjshëm.