Prokuroria e Posaçme kundër Korrupsionit dhe Krimit të Organizuar (SPAK) ka vënë sekuestro mbi pasuritë e Ergys Agasis dhe Ermal Beqirit, të dyshuar si krerë të një grupi kriminal, si dhe të disa të dyshuarve të tjerë.
Emisioni "Në Shënjestër", me autore Klodiana Lalën në News24, publikoi detaje nga aksioni i SPAK.
Ergys Agasis i përkasin 29 pasuri të sekuestruara, duke përfshirë apartamente, vila dhe sipërfaqe toke në zona të preferuara të Tiranës dhe Durrësit, shtatë llogari bankare, si dhe kompania AE SOLUTION.
Ermal Beqirit i janë vënë nën sekuestro 10 pasuri të paluajtshme, përfshirë një jaht luksoz, llogaritë e kompanisë Soft&Solution, tetë automjete dhe llogaritë personale.
Gjithashtu, u bllokuan fondet e kompanive:
- FIRST, pronë e Gëzim Hoxhës;
- Fasttech dhe Fasttech&Fresh, pronë e Andis Papas;
- Albascan, pronë e Elision Jorgjis.
Sipas prokurorisë, Ergys Agasi dhe Ermal Beqiri urdhëronin rrëmbimin e rivalëve dhe i kërcënonin për t'i detyruar të tërhiqeshin nga tenderat.