Prokuroria e Posaçme Kundër Korrupsionit dhe Krimit të Organizuar (SPAK) ka sekuestruar dosjen e tenderit për zhvillimin e projektit të Portit të Ri Tregtar në Porto Romano. Sekuestrimi u krye të martën pranë Autoritetit Portual Durrës, ku ndodhej dokumentacioni i plotë i procedurës, në kuadër të një hetimi për dyshime mbi shkelje në procedurën e prokurimit.
Tenderi, me vlerë rreth 400 milionë euro pa TVSH dhe i financuar nga buxheti i shtetit, u shpall në dhjetor 2024. Procedura u zhvillua në dy faza: parakualifikim dhe kualifikim. Në fazën e parë hynë pesë operatorë ndërkombëtarë, por u skualifikuan konsorciumet europiane Jan De Nul, grupi Vinci dhe kompania holandeze Van Oord, midis arsyeve mungesa e ekuivalentimit të licencave dhe dokumentacionit të stafit. Van Oord paraqiti ankesë më 14 mars 2025, e cila u refuzua nga Komisioni i Prokurimit Publik.
Në garë mbeti vetëm kompania greke Archirodon, e cila paraqiti ofertën financiare më 9 mars 2025 dhe kaloi në fazën përfundimtare. Hetimet e SPAK pritet të verifikojnë respektimin e kritereve ligjore dhe parimeve të barazisë në garë. Autoriteti Portual Durrës nuk ka dhënë ende reagim zyrtar.
Ky sekuestrim vjen pas çështjes së tenderave të AKSHI-së, ku në hetim është Ergys Agasi, bashkëpunëtor i ngushtë i kryeministrit Edi Rama, i shpallur në kërkim. Disa orë më parë u shkarkua zv/kryetarja e Qeverisë dhe ministrja e Infrastrukturës dhe Energjisë, Belinda Balluku.
Në mbledhjen e grupit parlamentar socialist në Pallatin e Brigadave, Edi Rama foli për presione të jashtme mbi hetimet e SPAK-ut. Ai përmendi qeverinë gjermane dhe ministrin e Jashtëm Johan Wadephul, duke thënë se Berlini ka ndikuar në nxitjen e tyre, fillimisht për AKSHI-në dhe tani për Porto Romano. Rama u shpreh se Gjermania po shfrytëzon dobësitë për të penguar interesat e Shqipërisë. Wadephul vizitoi Tiranën në nëntor 2025 dhe vlerësoi punën e SPAK-ut.
Përditësime
Konsorciumi ARCHIRODON CONSTRUCTION – DEME DREDGING NV – SOCIETÀ ITALIANA DRAGAGGI S.P.A. ka kërkuar shtyrjen e shpalljes së fituesit të tenderit për Porto Romano.
Shpallja zhvendoset nga 31 janari, siç premtoi Belind Balluku, në 9 mars.
Konsorciumi shpjegon: "Kërkuam shtyrje për të koordinuar me nënkontraktorët dhe për të siguruar përmbajtje vendore të mjaftueshme."