Struktura e Posaçme kundër Krimit të Organizuar dhe Korrupsionit (SPAK) ka shpallur zyrtarisht fillimin e procedurës së konkurrimit për rekrutimin e 40 hetuesve të rinj në Byronë Kombëtare të Hetimit (BKH). Ky proces synon të afrojë profesionistë që do t'i nënshtrohen një regjimi të posaçëm ligjor, me një angazhim minimal prej 7 vitesh shërbim pas përfundimit të trajnimit.
Kriteret e aplikimit
Kandidatët që aspirojnë të bëhen pjesë e BKH-së duhet të plotësojnë një sërë kërkesash të përcaktuara në njoftimin zyrtar:
• Të jenë shtetas shqiptarë.
• Të posedojnë diplomë të arsimit të lartë policor, juridik, kontabilitet ose fusha të tjera të lidhura me misionin e institucionit.
• Të kenë përvojë pune mbi 1 vit në institucionet e zbatimit të ligjit ose fusha të ngjashme.
• Të përmbushin standardet e larta të integritetit, sigurisë, pasurisë dhe figurës, siç parashikohet nga ligji nr. 95/2016.
Procesi i përzgjedhjes
Konkurrimi është i hapur dhe bazohet në meritokraci, duke përfshirë disa faza eliminatore të pikëzuara:
- Testimi konjitiv, i sjelljes dhe arsyetimit logjik.
- Testimi i aftësive fizike.
- Testi i zgjeruar me shkrim.
- Intervista e strukturuar.
Përveç fazave të mësipërme, kandidatët duhet t’i nënshtrohen detyrimisht edhe verifikimit të figurës dhe pasurisë, kontrollit mjekësor e psikologjik, si dhe testit të poligrafit. Ndonëse këto nuk pikëzohen, ato janë kusht i domosdoshëm për vazhdimin e procedurës.
Procedura e aplikimit
Kandidatët duhet të dërgojnë dokumentacionin e plotë elektronikisht në adresën bkh.aplikim@spak.gov.al, si dhe një kopje fizike në adresën postare: Byroja Kombëtare e Hetimit, rruga Jordan Misja, nr. 1, Tiranë. Afati i fundit për dorëzimin e dokumentacionit është data 14 shtator 2026, ora 16:00. Pas emërimit, hetuesit do të jenë subjekt i deklarimit periodik të pasurisë dhe kontrollit të vazhdueshëm të telekomunikimeve.
Përditësime
Byroja Kombëtare e Hetimit (BKH) specifikoi kriteret për kandidatët që synojnë 40 pozicionet e reja. Aplikantët duhet të zotërojnë diplomë në arsimin e lartë policor, juridik, kontabilitet ose degë të tjera të lidhura me misionin e institucionit. Kërkohet gjithashtu minimumi një vit përvojë pune në institucionet e zbatimit të ligjit ose fusha të ngjashme.