Spanja është kthyer në pikën kryesore të vrojtimit për miliona astronomë dhe turistë, të cilët kanë mbushur vendin për të ndjekur eklipsin total të Diellit. Fenomeni, i cili nuk është shfaqur në Spanjë prej më shumë se një shekulli, do të jetë i dukshëm përgjatë një shtegu prej 200 kilometrash, nga A Coruña në veriperëndim deri në ishullin e Majorkës.
Përgatitjet dhe masat e sigurisë
Autoritetet spanjolle kanë ndërmarrë masa të gjera për të përballuar fluksin e vizitorëve, duke parashikuar deri në 1.5 milionë udhëtime shtesë me automjete. Për shkak të kushteve meteorologjike, ku temperaturat pritet të arrijnë në 40 gradë Celsius, është shpallur alarm për rrezik të lartë nga zjarret. Për mbarëvajtjen e situatës janë angazhuar mbi 24 mijë efektivë policie.
Ndërkohë, kërkesa për syze speciale ka qenë e lartë, duke bërë që shumë farmaci dhe optika t'i kenë shitur të gjitha rezervat. Astronomi Cesar Gonzalez nga Planetariumi i Madridit e ka cilësuar këtë ngjarje si një prej spektakleve më të rralla të natyrës. Për vrojtimin e eklipsit, linja ajrore Iberia ka organizuar fluturime speciale, ndërsa shumë vizitorë janë zhvendosur drejt zonave rurale në kërkim të horizonteve të pastra.
Shtrirja e fenomenit
Përveç Spanjës, eklipsi total do të jetë i dukshëm edhe në pjesë të Portugalisë, Groenlandës dhe Islandës. Ndërkohë, dhjetëra miliona banorë në vende të tjera të Evropës Perëndimore, si Mbretëria e Bashkuar, Francë, Belgjikë, Zvicër dhe Italia veriore, do të kenë mundësinë të ndjekin eklipsin si fenomen të pjesshëm. Faza e totalitetit, ku Hëna mbulon plotësisht Diellin, do të zgjasë më pak se dy minuta, moment që pritet të shënohet si një përvojë e paharrueshme për pjesëmarrësit.