Pedro Sánchez, kryeministri i Spanjës, shpalli të hënën tre ditë zie kombëtare për viktimat e aksidentit hekurudhor të ndodhur dje pranë qytetit të Adamuz-it në provincën jugore të Kordobës.
Dy trena me shpejtësi të lartë u përplasën, duke lënë 39 viktima dhe mbi 100 të plagosur, sipas autoriteteve. Disa burime raportojnë rreth 150 të lënduar.
Zia kombëtare fillon sonte në mesnatë dhe zgjat deri të enjten, me flamujt e ulur në gjysmë shtizë dhe aktivitete nderimi. Sánchez premtoi një hetim të plotë dhe transparent: «Do ta zbulojmë të vërtetën dhe do t’ia bëjmë të ditur publikut me transparencë dhe qartësi absolute».
Ai e bëri këtë deklaratë gjatë një fjalimi të shkurtër në vendngjarje. Komiteti i Hetimit të Aksidenteve Hekurudhore ka nisur punën për zbardhjen e shkaqeve.
Përditësime
Autoritetet spanjolle e kanë rritur numrin e viktimave nga 39 në të paktën 40 në aksidentin hekurudhor.
Ekipe shpëtimi vazhdojnë kërkimet nën rrënoja.
Aksidenti është më i rëndi në Spanjë në më shumë se një dekadë.
Adif raportoi se aksidenti ndodhi në orën 19:45 të dielën. Një tren udhëtonte nga Malaga drejt Madridit, ndërsa tjetri nga Madridi drejt Huelvas.
Ministri i Transportit Óscar Puente deklaroi se forca e përplasjes shtyu vagonët në argjinaturë, me shumicën e viktimave në vagonët e parë të trenit nga Madridi. Ai e përshkroi aksidentin si 'jashtëzakonisht të çuditshëm' dhe paralajmëroi se hetimi mund të zgjasë të paktën një muaj.
Kryeministri Pedro Sánchez tha: 'Kjo është një ditë pikëllimi për të gjithë Spanjën' dhe premtoi transparencë të plotë.
Ekipe shpëtimi po hasin vështirësi në nxjerrjen e njerëzve nga rrënojat e shtrembëruara.