Gjykata Speciale në Hagë zhvillon seanca gjyqësore nga 11 deri 15 maj 2026 në rastin "Hashim Thaçi dhe të tjerët kundër administrimit të drejtësisë". Seanca e parë mbahet sot, më 11 maj, duke filluar në orën 9:30.
Të akuzuarit janë ish-presidenti Hashim Thaçi, ish-drejtori i AKI-së Bashkim Smakaj, ish-pjesëtari i UÇK-së Fadil Fazliu, ish-kryetari i Malishevës Isni Kilaj dhe ish-zëvendëskryeministri Hajredin Kuçi. Sipas aktakuzës, Thaçi individualisht dhe përmes veprimeve të përbashkëta me të tjerët ka ndjekur një model sjelljeje për të penguar personat zyrtarë në kryerjen e detyrave të tyre.
Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në Hagë më 6 dhjetor 2024, në bazë të aktakuzës së konfirmuar dhe fletarrestimeve. Hashim Thaçi-s i dorëzohet fletarrestimi në objektin e paraburgimit në Hagë më 5 dhjetor 2024. Hajredin Kuçi-s i është dorëzuar aktakuza dhe fletëthirrja për paraqitje më 9 dhjetor para gjykatëses së procedurës paraprake.
Akuzat specifike përfshijnë:
- Për Thaçi: Tri akuza për tentativë pengimi të personit zyrtar, tri për shkelje të fshehtësisë së procedurës dhe katër për mosbindje ndaj gjykatës.
- Për Kilaj, Smakaj dhe Fazliu: Tentativë pengimi të personave zyrtarë dhe mosbindje ndaj gjykatës.
- Për Kuçi: Dy akuza për mosbindje ndaj gjykatës.
ZPS-ja pretendon se Thaçi u ka dhënë udhëzime të akuzuarve të tjerë gjatë vizitave në qendrën e paraburgimit për të ndikuar dëshmitarët në rastin kryesor për krime lufte dhe krime kundër njerëzimit. Në seancën fillestare më 27 shkurt 2026, të gjithë të akuzuarit u deklaruan të pafajshëm për veprat penale të ngarkuara.