Gjatë qëndrimit në Uashington të Shteteve të Bashkuara të Amerikës më 6 shkurt 2026, Ministrja për Europën dhe Punët e Jashtme Elisa Spiropali u ftua si folëse kryesore në Shkollën e Studimeve të Avancuara Ndërkombëtare të Johns Hopkins.
Aty, së bashku me ekspertin Edward Joseph, profesorë, studentë dhe shqiptarë që jetojnë në SHBA, ajo analizoi rrugëtimin e Shqipërisë drejt Bashkimit Europian dhe rolin e ri të vendit në arenën ndërkombëtare. Spiropali u ndal te shndërrimi i Shqipërisë nga vendi më i izoluar i Europës në vend kandidat që synon të ulet në tryezën e BE-së përmes rezultateve dhe zbatimit të reformave strukturore.
Progresi në negociata
“Në vetëm 13 muaj, hapëm të gjithë grupkapitujt e negociatave. Ky është rezultati i reformave të vështira dhe i fokusit të qëndrueshëm politik. Por tani fillon puna më e vështirë. Po punojmë intensivisht dhe përmes një agjende objektivash për të mbyllur grupkapitujt deri në vitin 2027 dhe për të siguruar anëtarësimin deri në vitin 2030”, tha Spiropali.
Ajo përmendi progresin në fusha si sundimi i ligjit, lufta kundër krimit dhe korrupsionit, fuqizimi i institucioneve demokratike. Ministrja vlerësoi mbështetjen e SHBA-së në forcimin e reformës në drejtësi dhe transparencës, duke e quajtur atë reformën më të thellë dhe transformuese në Shqipërinë moderne.
Ankorimi i Shqipërisë drejt vlerave perëndimore është strategjik dhe i rrënjosur në identitetin dhe realitetet e sigurisë. “Administratat ndryshojnë, politikat evoluojnë, por busulla strategjike e Shqipërisë nuk mund dhe nuk do të largohet nga bashkësia euroatlantike”, deklaroi ajo.
Samiti i Këshillit të Atlantikut
Spiropali mori pjesë gjithashtu në Samitin “Western Balkans Forward”, të organizuar nga Këshilli i Atlantikut. Në panel me ambasadorin Philip Reeker dhe gazetaren Ilva Tare, ajo foli për “imperativin gjeopolitik të zgjerimit të BE-së drejt Ballkanit Perëndimor”.
“Procesi i zgjerimit të BE-së është një instrument gjeostrategjik që garanton sigurinë europiane. Ballkani Perëndimor nuk është më një zonë pas-konflikti, por një vijë e parë e sigurisë dhe e konkurrencës evropiane. Paqëndrueshmëria rajonale, ndikimi rus dhe presionet hibride e bëjnë zgjerimin më urgjent”, theksoi Ministrja.
Sipas saj, zgjerimi është interes strategjik për SHBA-në dhe BE-në, një proces transformues e i lidhur me kohën, ku çdo zvarritje përbën rrezik sigurie. Të gjitha vendet e Ballkanit Perëndimor duhet të përparojnë, sepse një rajon i integruar në BE është më i sigurt dhe me më shumë bashkëpunim.