Elisa Spiropali, ministre për Evropën dhe Punët e Jashtme, u prit në Kongresin Amerikan nga kongresmeni Keith Self, kryetar i Nënkomisionit për Evropën dhe iniciues i "Projektligjit për Vlerësimin e Diskriminimit në Luginën e Preshevës".
Ky projektligj kërkon nga Departamenti i Shtetit Amerikan monitorimin dhe raportimin mbi trajtimin e shqiptarëve në Luginën e Preshevës.
Gjatë takimit, Spiropali theksoi se nisma e kongresmenit Self përfaqëson një hap të rëndësishëm në ndërkombëtarizimin e problemeve serioze me të cilat përballen shqiptarët atje dhe adresimin e tyre institucional. "Shqipëria mbetet e përkushtuar për mbrojtjen e të drejtave të shqiptarëve kudo që ata ndodhen, në bashkëpunim me aleatët tanë", deklaroi ajo.
Në postimin e saj në rrjete sociale, Spiropali shkroi se takimi me Keith Self përbën një kënaqësi dhe ritheksoi rolin e projektligjit në monitorimin e situatës në Luginë.
Vizita e Spiropalit në Uashington do të vazhdojë me takime në Departamentin e Shtetit Amerikan dhe në organizata si dhe think-tanke me fokus zhvillimet e fundit globale.