Elisa Spiropali, ministre për Europën dhe Punët e Jashtme, gjatë vizitës zyrtare në Kiev, u ndal pranë Qendrës Mjekësore të Ministrisë së Brendshme, ku takoi luftëtarët ukrainas që po i nënshtrohen procesit të rehabilitimit pas plagëve të rënda të marra në frontin e luftës.
Ajo publikoi në rrjetet sociale një video ku bisedoi me ta dhe vlerësoi sakrificën e mijëra burrave e grave që kanë mbrojtur Ukrainën, ndërsa familjet e tyre përballen me trauma të rënda nga lufta. Ministrja u shpreh: “Shërbimi i tyre deri në sakrificë ndaj atdheut është një shërbim i lartë për mbrojtjen e dinjitetit dhe lirisë njerëzore në kontinentin tonë.”
Vizita, e nisur një ditë më parë, përfshiu takime me zyrtarë të lartë ukrainas. Në këto takime, Spiropali rikonfirmoi mbështetjen e Shqipërisë për popullin ukrainas përballë sulmeve masive që kanë goditur popullsinë civile dhe infrastrukturën kritike. Ajo theksoi se solidariteti i Shqipërisë me Ukrainën është i palëkundur dhe se vendi do të vijojë të kontribuojë në mbështetje të lirisë dhe pavarësisë së saj.