Agjencia e vlerësimit të kreditit Standard & Poor's Global Ratings ka rikonfirmuar vlerësimin afatgjatë të kreditit sovran të Shqipërisë në nivelin BB, duke ruajtur perspektivën të qëndrueshme. Në raportin e publikuar më 21 shtator 2026, agjencia vlerëson qëndrueshmërinë e ekonomisë shqiptare, e cila gjatë periudhës 2022-2025 ka shënuar një rritje mesatare vjetore prej 4%.
Treguesit ekonomikë dhe fiskalë
Për vitin 2026, parashikohet një rritje e PBB-së reale prej 3.4%, ndërsa për periudhën 2027-2029 rritja pritet të jetë mesatarisht 3% në vit. Ky parashikim mbështetet nga performanca e turizmit, eksportet e shërbimeve, konsumi privat dhe investimet.
Sipas raportit, financat publike paraqiten të forta, me një deficit buxhetor të parashikuar në 2% të PBB-së për vitin 2026, nivel më i ulët se kufiri prej 2.3% i vendosur nga autoritetet shqiptare. Borxhi publik vlerësohet se do të ndjekë një trajektore zbritëse, duke rënë nga 52.9% në vitin 2025 në 50.5% në fund të vitit 2029. Shqipëria ka regjistruar suficit primar çdo vit që prej vitit 2023.
Stabiliteti financiar dhe procesi integrues
Në fund të korrikut 2026, rezervat valutore arritën në 8.1 miliardë euro, që përbëjnë rreth 27% të PBB-së. Sektori bankar vlerësohet si likuid dhe i mirëkapitalizuar, me kreditë me probleme që kanë rënë në 4%, duke shënuar një përmirësim të ndjeshëm krahasuar me nivelin prej 11% para pandemisë.
Standard & Poor's ka evidentuar gjithashtu progresin në procesin e integrimit në Bashkimin Europian, duke vënë theksin te reforma në drejtësi, luftën kundër korrupsionit dhe krimit të organizuar, si dhe hapjen e të gjashtë grupkapitujve negociues, zhvillime që konsiderohen si hapa kyç për anëtarësimin e vendit.