Presidenti gjerman Frank-Walter Steinmeier deklaroi në Helsinki se pret që SHBA të ruajë prani ushtarake në Gjermani, pavarësisht tërheqjes së njoftuar të disa mijëra trupave. Ai tha se SHBA-ja e kupton se stacionimi i trupave në vende kyçe, si Ramstein, është po ashtu në interesin e tyre strategjik. “Ne besojmë dhe mbështetemi në këtë”, u shpreh ai.
Në konferencën e përbashkët për shtyp me Steinmeier-in, presidenti i Finlandës Alexander Stubb shprehu bindjen se SHBA-ja do të vazhdojë të ndihmojë aleatët evropianë në rast agresioni rus. “Unë besoj se garancitë e sigurisë së SHBA-së vlejnë dhe do të vazhdojnë të vlejnë”, tha ai. Stubb shtoi se armët bërthamore ruse, të stacionuara 100 kilometra nga kufiri finlandez, nuk synojnë Helsinkin, Stokholmin apo Oslon, por Uashingtonin dhe Nju Jorkun.
Steinmeier u bëri thirrje evropianëve të qëndrojnë të qetë përballë deklaratave dhe njoftimeve të reja nga presidenti Trump. Stubb përshëndeti rolin e Gjermanisë si forcë kryesore politike dhe ushtarake në Evropë që nga pushtimi i Ukrainës nga Rusia në vitin 2022. “Një Gjermani më e fortë do të thotë një Evropë më e fortë. Ajo që Gjermania bën për mbrojtjen e saj shërben interesit të sigurisë evropiane në tërësi”, nënvizoi ai.
Deklaratat u bënë më 7 maj 2026, në një vizitë në Finlandë.