Gjykata Evropiane e të Drejtave të Njeriut në Strasburg i ka dhënë të drejtë ish-gjyqtarit të Apelit të Tiranës, Ervin Metalla, duke konstatuar shkelje të nenit 8 të Konventës Evropiane të të Drejtave të Njeriut. Ky nen garanton respektimin e jetës private dhe familjare.
Vendimi u publikua më 5 maj 2026 dhe është unanim. Gjykata vlerësoi se shkarkimi i Metallas nuk ishte proporcional me qëllimet legjitime të ndjekura nga organet e vettingut. Megjithëse veprimet e tij lidhur me një kredi të butë dhe kontrata të konsideruara fiktive ngrinin pyetje për sjelljen jashtëgjyqësore, ato nuk justifikonin sanksionin më të rëndë, pra shkarkimin e plotë nga sistemi i drejtësisë.
Metalla u shkarkua në korrik 2018 nga Komisioni i Pavarur i Kualifikimit (KPK) për probleme në kriterin e pasurisë. KPK e cilësoi sjelljen e tij joetike për një gjyqtar, pasi kishte përfituar kredi pa përmbushur kushtet ligjore. Vendimi u konfirmua nga Kolegji i Posaçëm i Apelimit (KPA) shtatë vite më parë.
Në aspektin financiar, Strasburgu urdhëroi shtetin shqiptar të paguajë:
- 20,400 euro për dëme materiale;
- 6,000 euro për dëme jomateriale;
- 6,000 euro për shpenzime gjyqësore.
Pagesat duhet të kryhen brenda tre muajve.
Gjykata thekson se, nëse aplikanti e kërkon, do të ishte e përshtatshme rihapja e procesit të vettingut për rishqyrtim në përputhje me standardet e nenit 8. Ky nuk është rasti i parë: më herët, gjyqtare Antoneta Sevdari fitoi në Strasburg pas shkarkimit nga vettingu.