Anis Mehmeti përballet me spekulime transferimi nga Bristol City. Trajneri Gerhard Struber bëri të ditur se lojtari shqiptar nuk do të luajë në ndeshjen e nesërme, pasi është në rrugë për teste mjekësore te Ipswich.
Struber shprehu hapur zhgënjimin e tij. Ai vlerësoi zhvillimin e shpejtë të Mehmetit në muajt e fundit dhe paraqitjet e tij në pesë apo gjashtë muajt e fundit, duke thënë se oferta të mëdha nuk janë surprizë. "Nga njëra anë, është mirë të shohësh se si zhvillohen lojtarët dhe interesohen klubet e tjera. Nga ana tjetër, është për të ardhur keq që humbasim një lojtar kaq interesant në momente vendimtare", deklaroi trajneri austriak.
Ai shtoi se nuk është momenti për ankim dhe se skuadra duhet të ecë përpara. "Nuk është në dorën time. Duhet të përqendrohemi te fitorja nesër dhe ndeshjet e ardhshme", tha Struber.
Mehmeti ende nuk ka rinovuar kontratën. Struber përmendi interesin nga Ipswich, Wolverhampton dhe Toulouse. Ai pret rinovimin dhe kërkon lojtarë të impenjuar. "Na duhen lojtarë që dashurojnë të luajnë për Bristol Cityn dhe nuk mendojnë në drejtime të tjera", u shpreh ai.