Pasditen e së dielës, studentët e degës së Juridikut në universitete shqiptare të RMV-së, të cilët protestuan së fundmi në Shkup për zhvillimin e provimit të jurisprudencës në gjuhën shqipe, nisën në Kumanovë mobilizimin për hapat e mëtejshëm.
Një debat u zhvillua në shkollën fillore komunale "Naim Frashëri" në Kumanovë, ku pjesëmarrësit u njohën me situatën aktuale dhe diskutuan organizimet e ardhshme.
Organizatori i protestave studentore, Mevlan Ademi, deklaroi: «Takohemi me kolegët dhe studentët e qytetit të Kumanovës, të cilët edhe e mbështetën protestën tonë, njihemi me ata, ua dëgjojmë këshillat dhe në përgjithësi jemi në qëndrimin tonë të përbashkët. Bashkimi i studentëve shqiptarë është rëndësia jonë dhe që çdo kërkesë e radhës të jetë e njëzëshme. Qëllimi kryesor i debatit të sotëm ishte në lidhje me përdorimin e gjuhës shqipe në institucionet dhe provimin e jurisprudencës».
Studentja në UNT, Arlinda Emini, shtoi: «Qëllimi i këtij takimi ishte që të bisedojmë rreth protestës që realizuam, ankesa, sugjerime apo vlerësime rreth saj, me qëllim që të vazhdohet në mënyrën e njëjtë, si dhe t’i informojmë në numër sa më të madh se për çka kemi dalë dhe çka është provimi i Jurisprudencës».
Studenti Jon Selimi u shpreh: «Realisht jemi të kënaqur, pasi që kishte vullnet për të komunikuar, për të shprehur ide të ndryshme dhe për të pasur një pasqyrë më të qartë se si e shohin ata perspektiven e tyre, kauzën tonë, që na bëri të ndjehemi krenarë me faktin se ata ndihen pjesë e kësaj».
Nga debati u konstatua se studentët do të vazhdojnë protestat përderisa kërkesa refuzohet. Gjithashtu u paralajmërua organizimi i debateve të ngjashme në qytete të tjera të vendit.