Qyteti i Elbasanit dhe një pjesë e konsiderueshme e qarkut u përfshinë pasditen e kësaj të premteje nga një stuhi e fuqishme, e cila solli përkeqësim të menjëhershëm të kushteve atmosferike pas ditëve me temperatura të larta. Fenomeni natyror, i cili nisi rreth orës 14:50, u karakterizua nga reshje intensive shiu, prani e breshrit dhe erëra të forta.
Këto kushte ekstreme shkaktuan probleme në infrastrukturën rrugore. Sasia e madhe e ujit në disa akse urbane vështirësoi ndjeshëm lëvizjen e automjeteve, duke detyruar drejtuesit e mjeteve të lëvizin me shpejtësi të reduktuar për shkak të dukshmërisë së kufizuar. Edhe qarkullimi i këmbësorëve u bë thuajse i pamundur në shumë zona të qytetit.
Autoritetet lokale u bënë thirrje banorëve të shmangin lëvizjet e panevojshme dhe të tregojnë kujdes maksimal gjatë qarkullimit për shkak të erërave të forta që kanë shtuar rrezikun në disa zona. Deri në këto momente, nuk ka njoftime për dëme në njerëz, ndërsa institucionet po monitorojnë situatën teksa reshjet vijojnë me intensitet.