Reshjet e shiut dhe era e fortë kanë përfshirë pasditen e 16 majit 2026 qarkun e Elbasanit. Akset rrugore nacionale mbetën të hapura, megjithëse kushtet atmosferike shkaktuan vështirësi lokale.
Rreth orës 14:00 në kthesat e Dragostunjës ndodhën rrëshqitje inertesh dhe aluvionesh në rrugë. Kjo situatë shkaktoi vetëm ngadalësim të lëvizjes së automjeteve, pa ndërprerje të qarkullimit. Në vend ndodhen efektivët e Policisë Rrugore dhe punonjësit e firmës kontraktuese që po kryejnë pastrimin e aksit.
Në fshatin Sinaballaj të njësisë administrative Karinë, në bashkinë Peqin, është shembur ura tip Bailey. Ngjarja nuk shkaktoi dëme në njerëz apo mjete. Autoritetet dyshojnë se shembja erdhi si pasojë e kalimit të mjeteve të tonazhit të rëndë gjatë natës.
Si pasojë e dëmtimit të urës është ndërprerë qarkullimi për 9 fshatra të zonës së Peqinit dhe disa zona të Rrogozhinës. Autoritetet po punojnë për hapjen e një kalimi të përkohshëm pranë urës, me qëllim rikthimin sa më shpejt të lëvizjes së banorëve dhe mjeteve.