Stuhia dhe erërat e forta që kanë përfshirë Kosovën kanë shkaktuar rrëzimin e drunjve në aksin rrugor R115, në hyrje të Shtërpcës. Si pasojë e këtij incidenti, disa automjete kanë pësuar dëme materiale.
Ministria e Infrastrukturës dhe Transportit njoftoi se ekipet e mirëmbajtjes kanë dalë menjëherë në terren për të larguar pengesat dhe për të pastruar segmentin rrugor. Pas ndërhyrjes, aksi është liruar dhe aktualisht është plotësisht i qarkullueshëm për të gjitha automjetet.
Institucioni bëri të ditur se ekipet e mirëmbajtjes mbeten në gjendje gatishmërie për të menaxhuar situata të ngjashme që mund të vijnë nga kushtet e rënduara atmosferike. Qytetarëve u është bërë thirrje që të tregojnë kujdes të shtuar, të shmangin qarkullimin e panevojshëm gjatë stuhive dhe të përshtatin shpejtësinë me kushtet e rrugës.