Ky artikull është përditësuar. Shiko përditësimet
Reshjet e fundit të shiut dhe borës në Kosovë kanë shkaktuar probleme të mëdha në qarkullimin rrugor, për shkak të vërshimeve, grumbullimit të ujit dhe rrëshqitjeve të dheut. Hysen Durmishi, ushtrues i detyrës së ministrit të Infrastrukturës, ka njoftuar se ekipet emergjente janë në terren për të zgjidhur këto çështje.
Në rrugën Prishtinë–Ferizaj, qarkullimi është bllokuar plotësisht për shkak të grumbullimit të ujit, rezultat i kyçjeve ilegale në kanalet atmosferike. Ekipet po punojnë për shkarkimin e ujit dhe pritet që rruga të hapet brenda ditës.
Probleme të ngjashme janë raportuar në nënkalimin e Mazgitit, në drejtim të autostradës, ku ka grumbullim uji për shkak të bllokimit të kanalit atmosferik. Autoritetet po ndërhyjnë intensivisht për zhbllokimin e këtij segmenti.
Në autostradën Ibrahim Rugova, ka pasur rrëshqitje të dheut, ndërsa punimet për sanim po vazhdojnë me qëllim rikthimin e qarkullimit normal.
Në Sllatinë, në rrugën Fushë Kosovë–Gjurgjicë, ka grumbullim uji në rrugë. Ekipet emergjente janë duke ndërhyrë dhe pritet normalizimi i shpejtë i situatës.
Në rrugën Zhur–Dragash, është evidentuar lëvizje e trupit të rrugës. Autoritetet kanë vendosur sinjalizim përkatës dhe qarkullimi zhvillohet vetëm në një shirit.
Në disa zona të Suharekës, vërshimet kanë vështirësuar qarkullimin rrugor. Kryetari i Komunës, Bali Muharremaj, ka bërë thirrje për kujdes në rrugët e vërshuara dhe ka treguar se rruga nga fshati Tërrnje në drejtim të Nëpëbishtit është e bllokuar plotësisht.
Autoritetet kanë kërkuar mirëkuptimin e qytetarëve dhe kanë apeluar për shmangien e qarkullimit të panevojshëm në këto segmente deri në sanimin e plotë.
Përditësim
Bllokimi në rrugën Prishtinë-Ferizaj vazhdon pjesërisht në segmentet Llapnasellë, rrethin e Prishtina Mall dhe rrethin e Marigonës, sipas Policisë së Kosovës. Policia ka mbyllur pjesë të tjera për siguri.
Agjencia Hidrometeorologjike e Kosovës paralajmëron reshje bore pas shiut, me temperatura nën zero dhe rrezik ngricash në rrugë.
Ministria e Mbrojtjes shprehet e gatshme për të ndihmuar institucionet lokale.
Agjencia për Menaxhim Emergjent raporton vërshime të reja në:
- Dy rrugë në Prishtinë;
- Fshatin Smallush të Lipjanit;
- Rrugën Shtime-Reçak;
- Graçanicën afër qendrës tregtare.
Një familje u evakuua në Mitrovicë, ndërsa intervenime po kryhen në pjesë të tjera të Kosovës.
Përditësim
Hysen Durmishi konfirmoi përmes Facebook-ut angazhimin e ekipeve për pastrimin e rrugëve të bllokuara. Ai shprehu gatishmërinë për të ndihmuar institucionet lokale në përgjigje ndaj vërshimeve dhe apeloi për vozitje të kujdesshme, duke u përshtatur me kushtet e rrugës dhe duke theksuar rrezikun e ngricave.