Qyteti i Sarandës është përfshirë nga një stuhi e fuqishme gjatë orëve të natës. Megjithëse zgjati vetëm pak minuta, era e fortë shkaktoi probleme të shumta në infrastrukturën e qytetit dhe në bizneset përgjatë shëtitores.
Si pasojë e erës, disa pemë janë rrëzuar duke bllokuar rrugët. Në aksin rrugor përballë stadiumit, rënia e një pishe ka shkaktuar dëme materiale në 3 automjete të parkuara.
Sipas informacioneve nga Urgjenca e qytetit, tre shtetas janë paraqitur për ndihmë mjekësore për shkak të lëndimeve të shkaktuara nga thyerja e xhamave gjatë stuhisë. Pas marrjes së ndihmës së parë, ata janë larguar për në banesat e tyre.
Ekipet e shërbimeve të Bashkisë Sarandë ndodhen në terren për të monitoruar situatën, për të larguar pemët e rrëzuara dhe për të pastruar rrugët nga mbeturinat. Stuhi të ngjashme janë raportuar edhe në qytete të tjera të vendit, pas disa ditëve me temperatura të larta.