Një ngjarje tragjike ka ndodhur mbrëmjen e së shtunës në kryeqytetin gjerman, kur një furgon hyri me shpejtësi në turmën e pjesëmarrësve gjatë festimeve të 'Christopher Street Day' (Pride) në parkun Tiergarten të Berlinit. Si pasojë e përplasjes, një grua humbi jetën dhe të paktën 16 persona të tjerë mbetën të plagosur, disa prej të cilëve në gjendje të rëndë.
Pas përplasjes së furgonit me një pemë, drejtuesi braktisi automjetin dhe u largua nga vendngjarja në këmbë. Dëshmitarë okularë kanë raportuar për mediat se autori mund të ketë pasur me vete një mjet prerës, me të cilin dyshohet se ka goditur disa persona të tjerë, por autoritetet theksojnë se hetimet janë ende në fazën fillestare.
Zëdhënësi i policisë, Florian Nath, konfirmoi se i dyshuari është Abdul B., 21 vjeç, një person i njohur për forcat e rendit për shkak të lidhjeve të tij me qarqet radikale islamiste. Sipas agjencisë së lajmeve dpa, 21-vjeçari ishte liruar nga një qendër paraburgimi për të mitur në maj të vitit 2026. Policia e Berlinit ka kryer një operacion të gjerë kërkimi, duke kontrolluar edhe banesën ku jetonte i riu në lagjen Schöneberg, por pa arritur ta lokalizojnë atë deri më tani.
Autoritetet kanë publikuar fotografinë dhe përshkrimin e të dyshuarit, i cili është rreth 1.90 metra i gjatë, me trup të dobët dhe flokë të zinj. Policia u ka bërë thirrje qytetarëve që të mos i afrohen 21-vjeçarit në asnjë rrethanë pasi ai mund të jetë i armatosur dhe i rrezikshëm, si dhe ka kërkuar ndihmën e publikut për çdo informacion apo material filmik që mund të ndihmojë në zbardhjen e ngjarjes.
Kryebashkiaku i Berlinit, Kai Wegner, e cilësoi incidentin si një sulm ndaj shoqërisë së lirë, ndërsa kancelari Friedrich Merz premtoi hetime të plota për zbardhjen e këtij akti të rëndë.
Përditësime
Hetuesit kanë identifikuar autorin si një 21-vjeçar me shtetësi gjermane dhe origjinë libaneze, banues në lagjen Schöneberg. Sipas të dhënave policore, ai ka precedentë të mëparshëm për shantazh dhe agresion. Dëshmitë e fqinjëve për gazetën 'Die Welt' sugjerojnë se i riu kishte paralajmëruar prej kohësh për plane të ngjashme. Ndërkohë, bilanci shëndetësor i viktimave është rënduar: nga 16 të plagosurit, 3 ndodhen në gjendje kritike. Hetimet paraprake konfirmojnë se furgoni u përplas me një pemë në Lennéstrasse, pas së cilës autori braktisi mjetin dhe u arratis në këmbë.
Ngjarja ka ndodhur rreth orës 22:00. Policia e Berlinit përshkroi të dyshuarin si një person me mjekër, i veshur me kapuç të zi dhe pantallona të bardha. Autoritetet mohuan raportimet për arrestime të tjera, duke sqaruar se personat e ndaluar më herët nuk kishin lidhje me ngjarjen. Për shkak të sulmit, aktiviteti i Berlin Pride është ndërprerë dhe zona përreth Portës së Brandenburgut është evakuuar. Helikopterë mjekësorë janë angazhuar për transportin e shpejtë të të plagosurve nga zona e Reichstag.
Hetimet për sulmin me furgon në Berlin, ku humbi jetën një person dhe mbetën të plagosur 16 të tjerë, janë zgjeruar në kërkim të mundshëm të bashkëpunëtorëve të 21-vjeçarit Abdul B. Policia po verifikon nëse i dyshuari ka vepruar në grup ose nëse persona të tjerë janë në arrati. Dëshmitë e fqinjëve në Schöneberg, ku ai bashkëjetonte me familjen, tregojnë se i riu kishte shprehur prej muajsh synime për një sulm terrorist. Autoritetet po hetojnë këto deklarata për të përcaktuar rolin e rrjetit të tij shoqëror në këtë ngjarje.