Një incident me thikë ka ndodhur mëngjesin e sotëm në qendër të Ferizajt, ku dy persona kanë mbetur të lënduar pas një sulmi. Ngjarja është regjistruar rreth orës 07:50 në rrugën “Dëshmorët e Kombit”, në afërsi të Postës Qendrore.
Zëdhënësi i Policisë së Kosovës për rajonin e Ferizajt, Kanun Veseli, ka konfirmuar se të lënduarit kanë marrë ndihmën e parë në vendin e ngjarjes nga ekipet mjekësore dhe më pas janë transportuar për trajtim të mëtejshëm në Emergjencën e Ferizajt.
Sipas autoriteteve, i dyshuari është larguar menjëherë pas incidentit në drejtim të panjohur. Njësitë policore kanë dalë në vendin e ngjarjes dhe po ndërmarrin veprime intensive hetimore për identifikimin dhe arrestimin e të dyshuarit, si dhe për sqarimin e plotë të rrethanave të këtij rasti.