Ngjarja ndodhi rreth orës 08:00 të mëngjesit pranë hyrjes jugore të sitit arkeologjik të Akropolit, përballë Muzeut të Akropolit. Një 60-vjeçar, i cili dyshohet se vuan nga probleme të shëndetit mendor, sulmoi me thikë një çift turistësh. Sipas raporteve të autoriteteve, autori rezulton të ketë precedentë të mëparshëm penalë dhe raportohet se është person i pastrehë.
Oficerët e njësisë së motoçikletave DIAS ndërhynë menjëherë në vendngjarje për të neutralizuar dhe arrestuar autorin. Ekipet mjekësore të EKAV u dhanë ndihmën e parë të lënduarve, të cilët më pas u transportuan në spital për trajtim të mëtejshëm. Gruaja pësoi lëndime në këmbë, ndërsa burri mori plagë më të thella në krah, por gjendja e tyre paraqitet e stabilizuar dhe jashtë rrezikut për jetën.
Policia greke ka nisur hetimet për të zbardhur rrethanat e plota të incidentit. Sipas njoftimeve zyrtare, pak çaste para sulmit, autoritetet kishin marrë telefonata në lidhje me një person që kërcënonte kalimtarët në atë zonë. Pavarësisht ngjarjes, monumentet arkeologjike vijuan të funksiononin normalisht për mijëra vizitorët që frekuentojnë këtë atraksion botëror, ku çdo ditë hyjnë mes 15-20 mijë turistë.