Irani lëshoi dy raketa balistike ndaj bazës së përbashkët amerikano-britanike Diego Garcia në Oqeanin Indian më 21 mars. Baza ndodhet rreth 4.000 kilometra larg territorit iranian, duke treguar se raketat balistike të Teheranit tejkalojnë kufirin e mëparshëm prej 2.000 kilometrash, të vendosur nën sundimin e udhëheqësit të ndjerë suprem Ajatollah Ali Khamenei.
Lufta mes SHBA-së, Izraelit dhe Iranit ka hyrë në javën e katërt. Khamenei u vra nga një sulm i SHBA-së dhe Izraelit më 28 shkurt. Vendet evropiane kanë shqyrtuar ndihmë për zhbllokimin e Ngushticës së Hormuzit, por vetëm pas armëpushimit dhe me mandat nga Kombet e Bashkuara.
Zyrtarë në Bruksel e shohin këtë si dimension të ri të konfliktit. Një zyrtar i lartë i BE-së, duke folur anonimisht për Radion Evropa e Lirë, deklaroi se mbrojtja ajrore evropiane është e varfëruar. Shumë vende evropiane kanë dërguar sisteme si Patriot, SAMP/T dhe IRIS-T në Ukrainë, duke krijuar boshllëqe të konsiderueshme në mbrojtjen e kontinentit.
BE-ja ka dhënë mbi 70 miliardë euro ndihmë ushtarake për Ukrainën, e cila po përballet me pushtimin rus në vitin e pestë. Disa ministri evropiane të Mbrojtjes pranojnë mungesa në interceptorë ndaj një kërcënimi të tillë.