Java e tretë e Albi Mall Superligës së Kosovës vazhdon sot me dy përballje të rëndësishme, të cilat pritet të përcaktojnë ritmin e renditjes tabelare në këtë fazë të hershme të kampionatit.
Programi i ditës nis në stadiumin “Rexhep Rexhepi” në Drenas, ku Feronikeli '74 do të jetë nikoqir i Malishevës duke filluar nga ora 16:30. Ky duel shihet si një mundësi për të dyja skuadrat që të sigurojnë pikë të vlefshme në synimin e tyre për një renditje sa më të mirë.
Ndërkaq, vëmendja kryesore e mbrëmjes është përqendruar në Gjilan, ku nga ora 19:00 skuadra vendëse pret Dukagjinin. Kjo përballje shënon një moment historik për qytetin dhe klubin, pasi është ndeshja e parë e kampionatit elitar që do të zhvillohet nën ndriçimin e reflektorëve në stadiumin me bari artificial. Atmosfera pritet të jetë e veçantë, ndërsa të dyja ekipet kërkojnë ta shfrytëzojnë këtë rast për të siguruar fitoren.
Përditësime
Klubet kanë publikuar zyrtarisht formacionet për ndeshjen e orës 19:00. Gjilani starton me: Coric, Thaqi, Limani, Krivanjeva, Jashari, Potoku, Boshnjaku, Morina, Namani, Bilalli, Rrahmani. Dukagjini përgjigjet me: Hazhihamza, Bardhoku, Basri, Sinani, Bytyqi, Hugo, Pefqeli, Rexhaj, Zulfji, Stevenson, Isufi.