Ministri i Punëve të Brendshme i Kosovës, Xhelal Sveçla, në një prononcim për A2CNN, e ka vlerësuar si të pamjaftueshëm reagimin e deritanishëm të Bashkimit Evropian lidhur me deklaratat e ministres serbe Snezhana Paunoviq. Sipas Sveçlës, deklaratat e saj bien ndesh me vlerat perëndimore dhe përbëjnë shkelje të rëndë të standardeve evropiane.
Sipas ministrit, minimumi i masave që pritet nga presidenti i Serbisë, Aleksandër Vuçiq, është shkarkimi i Paunoviqit dhe nisja e procedurave për ndjekje penale ndaj saj. Ai theksoi se reagimet verbale nuk janë të mjaftueshme për të adresuar sjelljen e zyrtarëve serbë në raport me popullin shqiptar dhe integritetin territorial të Kosovës.
Në lidhje me lëvizjen e lirë, Sveçla konfirmoi se ministrja Paunoviq nuk do të lejohet të hyjë më në Kosovë. Ai deklaroi se ky vendim vlen për çdo person që cenon sovranitetin e shtetit të Kosovës, duke shtuar se qeveria do të ndërmarrë hapa të ngjashëm sa herë që të cenohen interesat kombëtare.