Anëtarë të komisionit parlamentar për të Drejtat e Njeriut, të kryesuar nga Jorida Tabaku dhe të shoqëruar nga deputeti Gazment Bardhi, realizuan një vizitë zyrtare në Mal të Zi, ku zhvilluan takime me përfaqësues të lartë të qeverisë dhe pushtetit vendor.
Gjatë takimit me ministrin e Energjisë dhe Minierave, Admir Šahmanović, palët diskutuan mbi mundësitë e rritjes së bashkëpunimit dypalësh në fusha strategjike si energjia, gazi, infrastruktura energjetike dhe qendrat e të dhënave. Tabaku theksoi nevojën për investime në zonat ku jetojnë shqiptarët, si dhe garantimin e përfaqësimit të tyre dinjitoz në jetën politike, institucionale dhe në kodin e ri zgjedhor.
Në takimin me ministren e Çështjeve Europiane, Maida Gorčević, fokusi ishte shkëmbimi i përvojave mbi procesin e integrimit në Bashkimin Europian. Tabaku vlerësoi progresin e Malit të Zi, duke theksuar se ky sukses vjen si pasojë e angazhimit politik, administratës së përqendruar te reformat dhe trajtimit të integrimit si një projekt kombëtar, i cili përfshin opozitën dhe aktorët e tjerë shoqërorë në vendimmarrje.
Sipas Tabakut, ky model i bashkëpunimit duhet ndjekur edhe nga Shqipëria, duke kërkuar që qeveria shqiptare të rrisë transparencën mbi agjendën e negociatave dhe sfidat e integrimit, duke mos e mbajtur këtë proces të kufizuar vetëm brenda zyrave të administratës.