Kryetarja e Komisionit për të Drejtat e Njeriut dhe Mediat, Jorida Tabaku, zhvilloi një vizitë në ish-burgun e Spaçit, ku mori pjesë në një aktivitet kushtuar kujtesës dhe rezistencës ndaj diktaturës. Ajo kërkoi ngritjen e një mekanizmi kombëtar për gjetjen, zhvarrimin dhe identifikimin e personave të zhdukur gjatë regjimit komunist.
Sipas Tabakut, më shumë se 30 vite pas rënies së sistemit, Shqipëria mban ende peshën e një heshtjeje të papranueshme ndaj krimeve të së shkuarës. Ajo nënvizoi se rreth 6,000 shtetas rezultojnë të zhdukur, ndërsa shumë të dënuar politikë u ekzekutuan apo humbën jetën në burgje pa iu dorëzuar trupat familjeve.
Duke iu referuar revoltës së 21 majit 1973, deputetja përmendi katër të dënuarit me vdekje trupat e të cilëve mbeten ende të paidentifikuar:
- Pal Zefi
- Hajri Pashaj
- Dervish Bejko
- Skënder Daja
Tabaku deklaroi se, ndërsa diktatura u përpoq t'i kthente viktimat në shifra dhe t'u mohonte varrin, është detyrë e shtetit demokratik të gjejë vendprehjen e tyre dhe t'ua kthejë familjeve, duke theksuar se ruajtja e kujtesës nuk mund të kufizohet vetëm te ngritja e muzeve.