Tarifat e reja të energjisë elektrike, të parapara të hyjnë në fuqi më 1 prill, shtyhen deri më 1 maj, bën të ditur kryesuesi i Bordit të Zyrës së Rregullatorit për Energji (ZRRE), Ymer Fejzullahu. Ai deklaroi për Radion Evropa e Lirë se tarifat aktuale do të mbetin në fuqi gjatë muajit prill.
ZRRE kryen shqyrtimin dhe përcaktimin vjetor të tarifave, të cilat zakonisht shpallen më 1 prill dhe vlejnë deri më 31 mars të vitit pasues. Në janar të këtij viti, tre operatorë energjetikë në Kosovë kërkuan rritjen e tarifave për vitin 2026:
- KESCO (Operatori për Furnizim me Energji Elektrike),
- KOSTT (Operatori i Sistemit, Transmisionit dhe Tregut),
- KEDS (Kompania për Distribuim të Energjisë Elektrike në Kosovë).
KESCO kërkoi rritje mbi 20%, duke u mbështetur në sasinë e madhe të importit të energjisë elektrike. Po ashtu, Korporata Energjetike e Kosovës (KEK) parashikon rehabilitimin e njësive gjeneruese në termocentralin Kosova B: njësia B1 për rreth 8 muaj dhe njësia B2 për 5 muaj në vitin 2025. Këto punime pritet të kufizojnë prodhimin vendor dhe të rrisin varësinë nga importi.
Arsye tjetër e përmendur është rritja e pagës minimale nga Qeveria e Kosovës. Zyrtarë të ZRRE-së kanë theksuar se kërkesat do t'i nënshtrohen shqyrtimit dhe do të miratohen vetëm kostot e arsyeshme. ZRRE shton se ende nuk ka shifër të saktë për përqindjen e rritjes. Sipas aplikimit të KESCO-së, të hyrat e lejuara maksimale për vitin e ardhshëm kërkohen 52 milionë euro.