Zyra e Rregullatorit të Energjisë (ZRRE) ka shtyrë afatin për dorëzimin e aplikimeve fillestare nga operatorët e sektorit energjetik në kuadër të procesit vjetor të shqyrtimit të tarifave. Afati i ri është caktuar për datën 28 janar 2026, pasi kompanitë nuk i kanë kompletuar ende dokumentet.
Drejtori menaxhues i ZRRE-së, Petrit Pepaj, ka njoftuar se shtyrja është bërë me kërkesë të të licencuarve për të mundësuar përgatitjen e plotë të dokumentacionit. Pas pranimit të aplikimeve, ZRRE do të kryejë shqyrtim të hollësishëm ligjor, rregullativ dhe financiar, si dhe proces konsultimi publik. Pepaj theksoi se në këtë fazë nuk mund të paragjykohet ndikimi në tarifat e energjisë elektrike për konsumatorët.
Vendimi për tarifat e reja pritet të merret para fundit të marsit 2026, ndërsa ato do të hyjnë në fuqi më 1 prill 2026. Kjo vjen në një kohë kur sektori energjetik përballet me reduktime të shpeshta të furnizimit nga KEK.
Reagimi i biznesit
Kryetari i Dhomës së Tregtisë dhe Industrisë, Kushtrim Ahmeti, deklaroi se operatorët zakonisht presin momentin e fundit për dorëzimin e dokumenteve. Ai shprehu dyshime se, për shkak të situatës në sektor dhe reduktimeve, kompanitë do të kërkojnë rritje të të hyrave, çka mund të ndikojë në rritje të tarifave për konsumatorët. Ahmeti u bëri thirrje qytetarëve të mos e pranojnë një rritje të re të çmimit të energjisë.
Në katër vitet e fundit, tarifat janë rritur tri herë gjatë shqyrtimeve në ZRRE, së fundmi në prill 2025 me 16.1% për të gjithë konsumatorët.