Gjatë seancës plenare të Kuvendit të Shqipërisë më 5 mars 2026, kreu i grupit parlamentar të Partisë Socialiste (PS), Taulant Balla, iu drejtua deputetes së Partisë Demokratike (PD), Albana Vokshit, me frazën "për ty kam numrin me 0900".
Sipas demokratëve, kjo i referohet një numri telefonik që vite më parë përdorej si linjë erotike. Balla e hodhi poshtë këtë interpretim, duke sqaruar se bëhet fjalë për një numër të gjelbër të Bashkimit Evropian (BE), të përdorur nga qytetarët për informacion në lidhje me vendimmarrjen e BE-së.
"Bëhet fjalë për një numër telefonik që në BE përdoret për të marrë informacion mbi Bashkimin Evropian. Kush ka nevojë të marrë informacion mbi BE, ka një numër ku mund të marrë informacion për vendimmarrjen e BE-së", u shpreh Balla. Ai theksoi se po fliste për reformën e BE-së dhe nuk kishte qëllim fyerjeje.
Balla i kërkoi ndjesë Vokshit nëse ndihej e fyer nga keqinterpretimi: "Sa i përket keqinformimit, nëse kolegia Vokshi ndihet e fyer, unë i kërkoj ndjesë". Ai akuzoi opozitën se po e përdor situatën për të nxitur protesta.
Në të njëjtin fjalim, Balla kërkoi masa ndaj deputetit Gazment Bardhi, i cili e kishte quajtur atë "legën", "i paburrë" dhe "ndyrësirë". Balla e cilësoi Bardhin si "rrugaç" dhe kërkoi ndërprerje seance për tensionet në sallë dhe dëmtimin e pajisjeve, derisa të rikthehet normaliteti.
Përditësime
Grupi parlamentar i PD kërkoi përjashtimin për 60 ditë të deputetit Taulant Balla nga punimet e Kuvendit, për cenimin e dinjitetit të deputetes Albana Vokshi.
Frazë e plotë e Ballës: «Realisht nuk kishim një numër tuajin që t’ju thërrisnin në telefon dhe t’ju thonim çfarë mendoni ju. 0900, se këtë numër kam për ty, Albana, padyshim».