Seanca plenare në parlamentin shqiptar rinisi më 5 mars 2026 me tensione të larta pas deklaratës së Taulant Ballës, kreu i Grupit Parlamentar të Partisë Socialiste.
Balla përmendi numrin 0900, të cilin demokratët e interpretuan si fyerje ndaj deputetes Albana Vokshi. Ai tha: "Realisht nuk kishim një numër tuajin që të ju merrnin në telefon dhe të ju thonim çfarë mendoni ju. 0900 se këtë numër kam, për ty Albana padyshim."
Reagimi erdhi fillimisht nga Gazment Bardhi. Më pas, Klevis Balliu u afrua drejt foltores dhe u përplas fizikisht me Ballën. Demokratët e tjerë u përfshinë në incident, çka solli ndërhyrjen e Gardës së Republikës.
Balla shpjegoi se numri 0900 përdoret për të marrë informacion në Bashkimin Europian dhe nuk kishte lidhje me fyerje. Ai i kërkoi ndjesë Albanës Vokshi nëse ajo u ndie e fyer dhe kërkoi ndërprerjen e seancës deri në qetësimin e situatës.
"Kjo situatë nuk ka të bëjë fare me fyerje. Ka të bëjë me një numër telefonik që përdoret për të marrë informacion në Bashkimin Europian. Sa i përket keqinformimit, nëse kolegia Vokshi ndjehet e fyer, i kërkoj ndjesë, por isha duke folur për reformën në BE. Ja ku e keni numrin me 0900", deklaroi Balla, ndërsa opozita vazhdoi me tone të ashpra.