Agjencia shtetërore iraniane e lajmeve, IRNA, ka bërë publike versionin e saj të një memorandumi mirëkuptimi, i cili sipas saj përputhet me objektivat kryesore të Teheranit në raport me SHBA. Dokumenti synon ndryshimin e dinamikave rajonale dhe përmban kërkesa për kompensim nga agresioni i mëparshëm amerikan dhe izraelit.
Sipas dokumentit të publikuar nga IRNA, pikat kryesore të kësaj marrëveshjeje të mundshme përfshijnë:
• Ruajtjen e programit bërthamor iranian si të paprekur, pa angazhime të reja dhe zhvillimin e bisedimeve për këtë çështje brenda 60 ditëve pas nënshkrimit.
• Mbajtjen e kontrollit të plotë të Ngushticës së Hormuzit nga Irani, duke përjashtuar ndërhyrjen e SHBA dhe duke favorizuar dialogun me Omanin.
• Ndërprerjen e plotë të armiqësive në të gjithë rajonin, përfshirë Libanin, ku SHBA do të duhej të ndikonte për ndalimin e konfliktit nga ana e Izraelit.
• Mekanizmin për lirimin e fondeve të ngrira iraniane dhe heqjen graduale të sanksioneve amerikane.
Megjithatë, autoritetet zyrtare iraniane kanë mbajtur një qëndrim rezervë ndaj këtyre pretendimeve. Ministria e Jashtme e Iranit ka mohuar përmbajtjen e këtyre raportimeve, duke i cilësuar ato si "thjesht spekulime mediatike". Ky reagim ka krijuar paqartësi rreth ekzistencës së një marrëveshjeje zyrtare, për të cilën në qarqet mediatike është përfolur se mund të përmbajë deri në 14 pika.