Memorandumi i mirëkuptimit ndërmjet Teheranit dhe Uashingtonit është kthyer në burim konfliktesh të hapura brenda hierarkisë së lartë në Iran, vetëm pak muaj pasi Mojtaba Khamenei mori detyrën si udhëheqës suprem.
Sfida e parë u shfaq më 29 qershor, kur 63 nga 88 anëtarë të Asamblesë së Ekspertëve publikuan një deklaratë përmes së cilës i bënin thirrje ekipit negociator të mos i tejkalojë "vijat e kuqe" të përcaktuara nga Khamenei. Megjithatë, sekretariati i këtij institucioni klerikal reagoi shpejt, duke sqaruar se deklarata nuk pasqyronte qëndrimin zyrtar të institucionit dhe e cilësoi atë si një veprim "të pazakontë dhe jotradicional".
Një tjetër incident ndodhi me transmetuesin shtetëror IRIB, i cili ndërpreu papritur një intervistë të regjistruar paraprakisht me kryetarin e Parlamentit, Mohammad Baqer Qalibaf. Ndërprerja ndodhi në çastin kur Qalibaf, njëherësh negociator kryesor, po fliste mbi procesin e zhbllokimit të aseteve iraniane. Zyra për media e Parlamentit deklaroi se nuk kishte pasur asnjë koordinim për ndalimin e transmetimit të materialit, i cili ishte dorëzuar dy orë përpara.
Analistët vlerësojnë se këto episode dëshmojnë ndryshimin e dinamikave politike pas ndërrimit të udhëheqjes suprem. Me mungesën e autoritetit personal të të ndjerit Ali Khamenei, institucionet shtetërore po përpiqen të testojnë hapësirat e tyre vendimmarrëse dhe ndikimin në narrativën politike të vendit.