Seanca parlamentare e sotme u shoqërua me debate dhe tensione të larta. Kryetari i Kuvendit Niko Peleshi i ndërpreu fjalën deputetit të opozitës Flamur Nokës, çka bëri që deputetët e opozitës të bllokojnë foltoren dhe të mos lejojnë vazhdimin e seancës.
Peleshi i dha fjalën nga vendi deputetes së PS-së Bora Muzhaqi. Sapo ajo filloi të flasë, deputetja e PD-së Elda Hoti u afrua dhe i mori kartën e mikrofonit. Në këto momente ndërhyri Taulant Balla, i cili debatoi ashpër me Hotin.
Sipas regjistrimeve, Taulant Balla tha: "Ta tregoj unë ty… Mos e prek, kaq po të them" dhe "Nuk merret karta e deputetit". Elda Hoti u përgjigj: "Kujdes kur flet ti me mua…", "Pse kush jam unë shoqja jote… Kush je ti?!". Bora Muzhaqi e quajti veprimin e Hotit të turpshëm, duke thënë: "Elda është e turpshme kjo që po bën, si mund të marrësh kartën e një vajze tjetër".
Pas këtyre tensioneve, seanca u ndërpre për disa momente.