Në ditën e nëntë të protestave të zhvilluara para godinës së Kryeministrisë, janë shënuar momente tensioni mes qytetarëve pjesëmarrës dhe anëtarëve të FRPD-së. Protestuesit kanë kundërshtuar praninë e forcave politike në tubim, duke kërkuar largimin e tyre me pretendimin se nuk dëshirojnë përfaqësim politik.
Sipas dëshmive nga vendngjarja, protestuesit kanë thirrur në kor parulla si "opozitë e shtirur", "shporrni partitë" dhe "opozita jemi ne". Një prej qytetarëve, përmes një megafoni, ka drejtuar akuza ndaj deputetit Redi Muçi të Lëvizjes Bashkë, duke pretenduar se ai po përpiqet të prishë protestën.
Përveç tensioneve me përfaqësuesit e opozitës, gjatë tubimit janë dëgjuar gjithashtu thirrje të drejtuara kundër "patronazhistëve" të Partisë Socialiste.